နှလုံးစည်းချက်မမှန်ခြင်းဆိုင်ရာအထူးကုဆေးခန်း
နှလုံးခုန်နှုန်းစည်းချက်မမှန်ခြင်းကို မည်သို့ကုသနိုင်သနည်း။
နေထိုင်မှုဘဝပုံစံပြောင်းလဲခြင်းသည် နှလုံးခုန်နှုန်းစည်းချက်မမှန်ခြင်းအတွက် အထောက်အကူဖြစ်နိုင်ပါသလား။
- ခန္ဓာကိုယ်လှုပ်ရှားမှုတစ်မျိုးမျိုးကြောင့် နှလုံးခုန်နှုန်းစည်းချက်မမှန်ခြင်းဖြစ်တတ်ပါက ထိုသို့သောလှုပ်ရှားမှုအား ပြုလုပ်ခြင်းမှ ရှောင်ကြဉ်ပါ။
- ဆေးလိပ်သောက်ခြင်းမှရှောင်ကြဉ်ပါ။
- အရက်သောက်သုံးခြင်းကို ကန့်သတ်ထားပါ။
- ကဖင်းဓာတ် စားသုံး/သောက်သုံးခြင်း (ဥပမာ – ကော်ဖီ၊ လက်ဖက်ရည်၊ အားဖြည့်အချိုရည်များနှင့် ကဖင်းဓာတ်ပါဝင်သော ဆေးဝါးများ) ကို လျှော့ချ/ရပ်တန့်ပါ။ အချို့သောသူများသည် ကဖင်းဓာတ်၏အာနိသင်ကို ပိုမို၍ခံစားရတတ်ပါသည်။
- အချို့သော နှာစေး၊ ချောင်းဆိုးပျောက် ဆေးဝါးများသည် နှလုံးခုန်နှုန်းစည်းချက်မမှန်ခြင်းကို ဖြစ်စေတတ်သော လှုံ့ဆော်တတ်သောအာနိသင်ရှိ၍ ၎င်းတို့အားသုံးစွဲခြင်းမှ ရှောင်ကြဉ်ပါ။ ဆေးဝါးများကိုမသုံးစွဲမီ ဆေးအညွှန်းများကိုသေချာစွာလေ့လာခြင်း၊ ဆရာဝန်နှင့်တိုင်ပင်ခြင်းတို့ကို ပြုလုပ်ပြီးမှသာ သုံးစွဲသင့်ပါသည်။
နှလုံးခုန်နှုန်းစည်းချက်မမှန်ခြင်းကိုကုသရန် မည်သည့်ဆေးဝါးများရှိသနည်း။
- နှလုံးခုန်နှုန်းစည်းချက်မမှန်ခြင်းကိုကုသမှုဆေးများမှာ –
- နှလုံးခုန်နှုန်းစည်းချက်ကို ထိန်းညှိပေးသောဆေးဝါးများ
- သွေးကျဲဆေးနှင့် သွေးခဲပျော်ဆေးများ – ၎င်းတို့သည် သွေးကြောထဲတွင်သွေးခဲများဖြစ်ပေါ်ခြင်းမှတားဆီးပေးပြီး လေဖြတ်ခြင်းမှကာကွယ်ပေးပါသည်။ ၎င်းတို့တွင် – Warfarin၊ Aspirin ၊ Plavix (Clopidogrel) တို့ပါဝင်ပါသည်။ Pradaxa (dabigatran) ၊ Xarelto (Rivaroxaban) ၊ Apixaban (Eliquis) တို့သည် နှလုံးခုန်နှုန်းစည်းချက်မမှန်ခြင်းကို ကာကွယ်ရန်အတွက် နောက်ဆုံးပေါ်ဆေးအမျိုးအစားသစ်များဖြစ်ကြပါသည်။
ပြင်ပမှလျှပ်စီးကြောင်းဖြင့် နှလုံးလျှပ်စီးကြောင်းပြုပြင်ခြင်း – သည် သောက်ဆေးဖြင့်ထိန်းချုပ်ရာတွင် မသက်သာသော နှလုံးခုန်နှုန်းစည်းချက်မမှန်ခြင်းအတွက် ထိရောက်သည့်ကုသမှုနည်းလမ်းတစ်မျိုးဖြစ်ပါသည်။ ၎င်းမှာ လူနာအား မေ့ဆေးဖြင့်ယာယီပေးထားပြီး ပြင်ပမှလျှပ်စီးကြောင်းဖြင့် နှလုံးအားရင်ဘတ်ပေါ်မှရှော့ခ်ရိုက်၍ ပုံမှန်နှလုံးခုန်နှုန်းစည်းချက်ပြန်လည်ရရှိစေရန်လှုံ့ဆော်ပေးခြင်းဖြစ်ပါသည်။
နှလုံး Pacemaker စက်တပ်ခြင်း – သည် နှလုံးခုန်နှုန်းနှေးသူများတွင် ထိရောက်သောကုသမှုဖြစ်ပြီး နှလုံးအားပုံမှန်ခုန်နှုန်းဖြင့် အလုပ်လုပ်စေရန် လျှပ်စီးကြောင်းများထုတ်လွှတ်ပေးသောစက် တပ်ဆင်ထားခြင်းဖြစ်ပါသည်။ Pacemaker ၏တည်ဆောက်ပုံမှာ Pulse generator ဟုခေါ်သော ဘက်ထရီတပ်ဆင်ထားသည့်ကွန်ပြူတာအသေးစားမှတစ်ဆင့် လျှပ်စီးကြောင်းများကို နှလုံးကြွက်သားများသို့ ဝါယာကြိုး (leads) များတစ်လျှောက်စီးဆင်းစေပါသည်။ နောက်ဆုံးပေါ် Pacemaker များသည် ပိုမို၍တိကျပြောင်မြောက်သောလုပ်ငန်းဆောင်တာများကို လုပ်ဆောင်နိုင်ပြီး နှလုံး၏ပုံမှန်ခုန်နှုန်း၊ ကြိမ်နှုန်း ရရှိစေရန် လှုံ့ဆော်ပေးနိုင်ပါသည်။
နှလုံးခုန်နှုန်းထိန်းညှိစက် (ICD) – သည် အသက်အန္တရာယ်ပေးနိုင်သော နှလုံးအောက်ခန်းခုန်နှုန်းမြန်ခြင်း၊ တလှပ်လှပ်ခုန်ခြင်းရောဂါအခြေအနေများကို ထိရောက်စွာကာကွယ်မှုပေးနိုင်သော နက်နဲသောလုပ်ငန်းဆောင်တာများလုပ်နိုင်သည့် နောက်ဆုံးပေါ်နည်းပညာတစ်ခုဖြစ်ပါသည်။ ICD ၏လုပ်ငန်းဆောင်တာမှာ နှလုံးခုန်နှုန်းကို အချိန်ပြည့်စောင့်ကြည့်စောင့်ကြည့်နေပြီး ပုံမှန်မဟုတ်သောနှလုံးခုန်နှုန်းမြန်ခြင်းမျိုး တွေ့ရှိသည်နှင့်တစ်ပြိုင်နက် နှလုံးကြွက်သားများသို့ လျှပ်စီးကြောင်းထုတ်လွှတ်ပေးပြီး ပုံမှန်နှလုံးခုန်နှုန်းကို ပြန်လည်ရရှိစေပါသည်။
သွေးကြောမှတစ်ဆင့် နှလုံးလျှပ်စီးကြောင်းအပို မီးရှို့ကုသခြင်း (Catheter Ablation) – သည် ကြိမ်နှုန်းမြင့် လျှပ်စီးကြောင်းဓာတ်အားဖြင့် နှလုံး၏ပုံမှန်မဟုတ်သောလျှပ်စီးကြောင်းအပိုရှိရာနေရာသို့ ထုတ်လွှတ်ပေးပြီး ထိုလျှပ်စီးကြောင်းအားဖြတ်တောက်ပစ်ခြင်းဖြင့် ကုသမှုပေးပါသည်။ Catheter Ablation ကို PSVT၊ Atrial fibrillation၊ နှလုံးအပေါ်ခန်းခုန်နှုန်းမြန်၍နှလုံးအပေါ်ခန်းခါယမ်းခြင်း (Atrial flutter) နှင့် အချို့သောနှလုံးအပေါ်ခန်းနှင့်အောက်ခန်း နှလုံးခုန်နှုန်းစည်းချက်မမှန်ခြင်းတို့ကို ကုသရာတွင် အသုံးပြုပါသည်။ Catheter Ablation ကို အခြားသောကုသမှုနည်းလမ်းများနှင့်လည်း တွဲဖက်၍အကောင်းဆုံးကုသမှုရရှိအောင် လုပ်ဆောင်လေ့ရှိပါသည်။
နှလုံးခုန်နှုန်းစည်းချက်မမှန်ခြင်းအတွက် နှလုံးခွဲစိတ်မှု – ဆိုသည်မှာ နှလုံးအပေါ်ခန်းခုန်နှုန်းမြန်၍ တလှပ်လှပ်ခုန်ခြင်း (Atrial fibrillation) ကဲ့သို့သောအခြေအနေမျိုးတွင် ကုသမှုပေးခြင်းမျိုးဖြစ်ပါသည်။ ဥပမာအားဖြင့် Maze procedure ဟုခေါ်သောခွဲစိတ်မှုတွင် နှလုံးအပေါ်ခန်း ၂ ခန်း၏ လိုအပ်သောနေရာများကို ခွဲစိတ်ဓားဖြင့် အရာများပေးပြီး လျှပ်စီးကြောင်းပုံမှန်အတိုင်းပြန်လည်ဖြစ်သည်အထိ ခွဲစိတ်ကုသမှုပေးသည့် နည်းလမ်းဖြစ်ပါသည်။ အချို့သောလူနာများတွင် ထိုသို့ခွဲစိတ်မှုပြုလုပ်ပြီး နှလုံး Pacemaker ပါတပ်ဆင်၍ နှလုံးခုန်နှုန်းစည်းချက်မှန်ကန်အောင် ထိန်းချုပ်ရပါသည်။
နှလုံးခွဲစိတ်မှုကို နှလုံးခုန်နှုန်းစည်းချက်မူမမှန်ဖြစ်စေသောအခြားရောဂါအခြေအနေများကို ကုသရာတွင်လည်း ပြုလုပ်လေ့ရှိပါသည်။